Sakop ba ng Medicare ang mga Gamot sa Pagbabawas ng Timbang?

Narito ang maikling sagot. Simula Hulyo 1, 2026, sakop ng Medicare ang ilang gamot na GLP-1 para sa pagbabawas ng timbang — Wegovy®, Zepbound® (KwikPen® lamang), at Foundayo® — sa takdang $50 na Copayment bawat buwan. Ang saklaw ay nagmumula sa isang pansamantalang programa na tinatawag na Medicare GLP-1 Bridge, na tatakbo hanggang Disyembre 31, 2027. Para magamit ito, kailangan mo ng saklaw sa gamot ng Medicare (Medicare Part D), dapat ay 18 taong gulang ka pataas, at dapat mong matugunan ang mga patakarang pangkalusugan batay sa iyong body mass index (BMI).

Ano ang Medicare GLP-1 Bridge

Ang Medicare GLP-1 Bridge ay isang panandaliang programang pansubok na pinapatakbo ng Mga Sentro para sa mga Serbisyo ng Medicare at Medicaid, ang pederal na ahensya na namamahala sa Medicare. Tatakbo ito mula Hulyo 1, 2026 hanggang Disyembre 31, 2027, sa bawat estado at teritoryo ng U.S. Saklaw nito ang mga sumusunod na gamot:

• Foundayo® (tableta)
• Wegovy® (iniksyon o tableta)
• Zepbound® (KwikPen® lamang — hindi sakop ng programa ang mga single-dose na vial o pen ng Zepbound®)

Gumagana ang programa sa labas ng iyong regular na plano sa gamot sa ilalim ng Medicare Part D. Hindi kailangang sumali ang iyong plano sa gamot — kung kwalipikado ka, magagamit mo ang programa kahit anong plano ng Medicare Part D ang mayroon ka.

Sino ang Kwalipikado

Dapat ay mayroon kang saklaw sa gamot ng Medicare. Maaari itong maging standalone na plano sa gamot (PDP), isang plano ng Medicare Advantage na may saklaw sa gamot, isang Plano para sa mga Espesyal na Pangangailangan, isang plano ng waiver ng grupo ng employer o unyon, o ang programang LI NET. Dapat ka ring 18 taong gulang pataas at matugunan ang isa sa mga sumusunod pagsisimula mo ng terapiyang GLP-1:

• Isang BMI na 35 o mas mataas, nang mag-isa.
• Isang BMI na 30 o mas mataas kasama ang kahit isa sa mga sumusunod: diastolic heart failure, hindi makontrol na mataas na presyon ng dugo, o malalang sakit sa bato sa stage 3a o mas mataas.
• Isang BMI na 27 o mas mataas kasama ang kahit isa sa mga sumusunod: prediabetes, nakaraang atake sa puso o stroke, o baradong mga arterya sa binti o braso (peripheral artery disease) na may mga sintomas.

May ilang taong hindi karapat-dapat sa programang Bridge:

• Kung sakop na ng iyong plano sa Medicare Part D ang iyong gamot na GLP-1, patuloy mo itong makukuha sa pamamagitan ng iyong plano.
• Kung mayroon kang type 2 diabetes, katamtaman hanggang malubhang sleep apnea, o fatty liver disease, hindi mo magagamit ang Bridge — ngunit maaaring saklawin ng iyong plano sa Medicare Part D ang isang gamot na GLP-1 para sa mga kondisyong iyon.

Ano ang Babayaran Mo

Magbabayad ka ng $50 na Copayment sa botika para sa isang buwang supply (28 o 30 araw, depende sa gamot). Dahil ibang programa ng Medicare ang nagbabayad para sa gamot — hindi ang iyong regular na plano sa gamot — iba ang takbo ng $50 kumpara sa iyong mga normal na Copayment:

• Hindi ito binibilang sa iyong Deductible (Nababawas) sa Medicare Part D o sa taunang Pinakamataas na Limitasyon mula sa Sariling Bulsa.
• Hindi ito mapapababa ng Karagdagang Tulong at iba pang programa para sa mababang kita.
• Hindi mo ito maaaring hatiin sa buong taon gamit ang Medicare Prescription Payment Plan.
• Hindi ito lalabas sa iyong Paliwanag ng mga Benepisyo sa Medicare Part D o sa Medicare Summary Notice.

Paano Magsimula

1. Makipag-usap sa iyong doktor. Itanong kung makabubuti sa iyo ang isang gamot na GLP-1 at kung natutugunan mo ang mga patakarang pangkalusugan ng programa.
2. Magpapadala ang iyong Provider ng reseta para sa saklaw na gamot na GLP-1 sa iyong botika at, kapag hiniling, kukumpletuhin ang form ng Paunang Awtorisasyon. Dapat patunayan ng iyong Provider na ginagamit mo ang gamot bilang bahagi ng programa sa pamumuhay na nakatuon sa diyeta at ehersisyo.
3. Bantayan ang iyong mail. Makakatanggap ka ng liham na nagkukumpirma na sakop ang iyong gamot sa ilalim ng Medicare GLP-1 Bridge.
4. Kunin ang iyong reseta at magbayad ng $50 para sa bawat buwanang supply. Mananatiling may bisa ang iyong pag-apruba — kasama ang mga refill at pagbabago ng dosis — hanggang Disyembre 31, 2027, maliban kung magpalit ka ng gamot.
5. May mga tanong? Tumawag sa 1-800-MEDICARE (1-800-633-4227, TTY 1-877-486-2048) para tingnan ang iyong pagiging karapat-dapat o ang katayuan ng isang Paunang Awtorisasyon.

Mga Karaniwang Tanong